Fotografie en die versamel van alles wat moontlik aan fotografie verbind kan word is 'n soos 'n dwelm vir my. Dit verbaas my telkens hoe min vandag se fotograwe oor die geskiedenis van fotografie weet, om nie eers te praat van die beoefening  van die ou prosesse nie.  Fotografie kan volgens my as een van die wonders van die beskawing beskou word. Het u al ooit gedink hoe ons lewe vandag sou lyk as fotografie nie ontdek was nie?  Stel u die Internet voor sonder fotos, ondenkbaar!

My fotografiese ervaring  het in 1968 begin toe ek gesien het hoe 'n vriend 'n kontak afdruk uit 'n boek gemaak het.  Dadelik het ek het die ou buite toilet (darem toe al in onbruik...) in 'n donkerkamer omskep en ook kontak afdrukke begin maak.  Spoedig het ek my eerste vergroter en kamera gehad en het ek alles wat beweeg het afgeneem.  

Na skool het ek in die Staatsdiens begin werk as klerk en vir elke moontlike fotografiese pos aansoek gedoen.  In 1974 was ek suksesvol en het ek by die  H.F. Verwoerd hospitaal  as Donkerkamer Tegnikus begin werk en gevorder tot Senior Fotograaf. 

 Gedurende 1978 verhuis ek en my vrou, Annatjie, na  Bloemfontein, waar ek by die Universitas Hospitaal begin werk - weereens as Donkerkamer Tegnikus.  

Vanaf Augustus 1980 tot Januarie 1988 was ek werksaam by die Universiteit van die Oranje-Vrystaat, nadat hulle my 'n aanbod gemaak het om as Fotograaf aldaar te werk.  Hier doen ek o.a. ook ondervinding op in video- en klankredigering envoltooi  'n video kursus by die SAUK.  By  UOVS was ek bevoorreg om onder die bekwame leiding van Danie Roux die meeste oor  fotografie te leer ooit.  Die beste raad wat hy my gegee het  was om alles wat ek in die hande kon kry oor die onderwerp te lees.  Dit doen ek getrou tot  vandag nog. 

 Sedert 1988 is ek werksaam by die Universiteit van die Noorde in die Noordelike Provinsie as Hoof Fotograaf.   

In my werk as 'n Koöperatiewe Fotograaf by 'n tersiëre instelling  moet ek enige iets van joernalistieke- tot wetenskapsfotografie  kan hanteer, waar konvensionele sowel as digitale fotografie 'n ewe belangrike rol speel.  Die omvang en verskeidenheid wat beide mediums  noop my om  gereeld navorsing  te doen en toe te sien  dat ek op hoogte bly van die nuutse produkte en ontwikkelings.  Dit stel my in staat om  alle fotografiese uitdagings te kan hanteer en te  weet waar om na oplossings te gaan soek. In kort, geen fotograaf wat sy sout werd is  moet  wag om geleer te word nie, hy of sy moet self gaan leer en weet waar om wat oor elke faset van fotografie te kry.

Die ander groot passie in my lewe is my twee Fiat's. Ek het ook my eie web-ruimte vir die twee.

Klik hier en  kontak my asseblief - ek waardeer  kommunikasie oor alle vorms van fotografie.