VOU KAMERAS

Hierdie kamera is 'n Thornton-Picard Tripple Extension Imperial kamera wat dateer uit 1908. Dit is gemaak uit hout en brons. Die voorste en agterste panele is apart gekoppel aan die basis. Beide panele kan met 'n ratstel verskuif word om die blaasbalk tot 3x die normale lengte te verleng. Die voorste en agterste panele kan ook afsonderlik verstel word. Die sluiter is van lap. Sluiterspoed wissel van 1/15, 1/25, 1/40, 1/60 en 1/80. Die sluiter en spoed word gespan deur 'n veer in die meganisme op te wen met 'n toutjie wat getrek word. Die lens is 'n Cooke 8½x 6½ lens. Die kamera is in 'n puik werkende toestand. Dit het ook nog sy eie hout driepoot, oorspronklike seiltas en glas negatiefhouers - alles in perfekte toestand. 'n Kenmerk van voubare plaatkameras is dat die grondglas agter in die kamera se hoeke weggesny is. Dit is gedoen om te verhoed dat druk in die blaasbalk opbou wanneer die kamera toegemaak word.
Die No.3 Autographic Kodak kamera dateer uit 1919. Die romp is van hout, oorgetrek met 'n dik papier wat dit dan 'n leervoorkoms gee. Die rugstuk en deksel is van aluminium. Dit het 'n spesiale rol film geneem wat 'n dun papier soos deurslag papier tussen die agtergrond papier en film gehad het. Deur middel van 'n deurtjie in die rugstuk en 'n metaalpennetjie kon daar dan kort "notas" op die negatief gemaak word. Die druk van die pennetjie het die deurslag toegelaat om lig deur te laat wat die "nota" dan permanent op die negatief gemaak het. Die kamera is in 1919 deur die personeel van die N.I.Eskompto Mij., Soerabia, aan my Grootvader, T.C. Sandrock geskenk. Vervaardig 1914 - 1926 Film 118 Authographic film Lens Kodak Anastigmat f7.7 - f45 B/T 25 - 100ste/sek Oorspronklike prys $41.50
Hierdie Certo Folding Plate kamera is in Dresden Duitsland, vervaardig. Die romp is van aluminium en dit kan 4x5 plaat film neem. Ek het hierdie kamera by mnr J. van Vuuren in Bloemfontein gekry. Die kamera is in 'n puik werkende toestand. Vervaardig ± 1920 Film 4x5 plaat Lens Schneider & Co Kreuznach f4.5 - f36
Die Ensignett kamera wat dateer uit 1909 was baie populêr. Die kamera kon sonder moeite baie kompak opgevou word. Die kamera was baie meer kompak as enige vorige kamera vanuit die selfde era. Die kamera is vervaardig deur Houghtons, Ltd. in London. Die soeker (viewfinder) kon verstel word vir vertikale sowel as horisontale fotos. Die romp is van metaal. Onder die lens is 'n glyskaal om die fokus te stel van 5 vt tot oneindig. Die kamera is in 'n redelike toestand en werk nog. Vervaardig ± 1910 Film 127 Lens Valos Anastigmat Ensign Simplex f 7.7-32 Sluiter Vermoedelik "ball bearing"
Hierdie Kodak Jiffy het 'n baie interessante geskiedenis. Dit het oorspronklik aan John Martin behoort. Oom John is baie bekend in Pietersburg. Gedurende die Tweede Wêreld Oorlog het hy in Noord-Afrika geveg en hierdie kamera het hy oral saam met hom geneem. Die kamera is van bakeliet gemaak en is in 'n absoluut puik toestand. Daar is ook nog 'n film in die kamera wat klaar geneem is. Die leertassie is ook oorspronklik. Vervaardig 1936 Film 127
Vest Pocket Camera. Soos op die foto gesien kan word het die kamera 'n deksel agter wat daarop dui dat dit oor die authographic eienskap beskik. Hierdie eienskap is eers in 1915 op hierdie model aangebring. Opgevou is die afmetings van die kamera 25x61x121 mm. Die kamera het 'n enkel verstelbare soeker gehad. Hierdie reeks is in 1926 gestaak. Van 1912 tot 1926 is daar 2 000 000 van hierdie kameras verkoop. Die foto grootte was 41x64 mm Vervaardig 1925 - 1934 Film 127 Lens Meniscus achromat Sluiter Kodak Ball Bearing Oorspronklike prys $7.50
Kodak Sterling II. Hierdie kamera is ook in Engeland vervaardig. In die deksel van die kamera is daar 'n plakker wat waarsku dat 120 film nie daarin gebruik kan word nie. Vervaardig Film 620 Lens Anston 105 mm f4.5 fokusbaar Sluiter Pronto B - 200 Oorspronklike prys
Six - 20 "KODAK" Model C. Die kamera is een van die modelle wat in Engeland vervaardig was. Die kamera het 'n soeker op die lens en ook een op die romp. Hierdie kamera is in 'n puik toestand. Vervaardig 1935 Film 620 Lens Kodak Anastigmat 105 mm lens nr. 000 Sluiter Kodak Compur vervaardig in Duitsland. Sluiter spoed T - 250, f4,5 - 32 Oorspronklike prys $38.00
Voigtländer Vito II. Aan die binnekant van die filmdeksel is daar 'n plakkertjie waarop daar geskryf is "Foto Haas Frankfurt/M Steinweg 12 tel. 91187". Daar is ook 'n afdruk van 'n haas wat hardloop op. Die leer tassie is in 'n goeie toestand. Vervaardig Film 35 mm Lens Voigtländer Color-skopar 1:3,5/50 fokusbaar Sluiter Prontor-S Oorspronklike prys
Agfa Isolette. Die kamera is nog in 'n puik werkende toestand. Die leer tassie is ook in 'n goeie toestand. Vervaardig Film 120 Lens Agfa Apotar 1:4,5 fokusbaar. Sluiter Agfa Compur-Rapid Oorspronklike prys
Zeis Ikon Contina. Hierdie is werklik 'n lieflike kamera. Die fokus meganisme werk deur middel van die knop aan die regterkant van die kamera. Die afstand word dan per hand op die lens ingestel. Die knop aan die linkerkant dui die ASA aan. Onder aan die kamera is die knop waarmee die film aangedraai en terug gespoel word asook die teller. Die teller kanselleer nie outomaties nie maar word met die hand gestel. Die kamera is baie swaar vir sy grootte. Vervaardig Film 35 mm Lens Carl Zeiss Tessar 1:4,5 f = 45 mm Sluiter Synchro-Compur B - 500 Oorspronklike prys